Халықаралық туризм және меймандостық университетінде түлектермен мемлекеттік білім беру грантын міндетті еңбекпен өтеу мәселелеріне арналған ZOOM платформасы арқылы онлайн кездесу ұйымдастырылды.
Кездесудің негізгі мақсаты – мемлекеттік грант негізінде білім алған түлектерге еңбекпен өтеу талаптары туралы жан-жақты ақпараттар беру.
Онлайн кездесуге «Қаржы орталығы» АҚ өкілі Ануар Замирұлы спикер ретінде қатысып, мемлекеттік білім беру грантының шарттары, оны өтеу тәртібі, жұмысқа орналасу талаптары мен заңнамалық негіздері туралы кеңінен түсіндірді. Сонымен қатар, түлектер тарапынан қойылған сұрақтарға нақты жауап беріп, еңбекпен өтеу барысында туындайтын өзекті мәселелерге тоқталды.
Шара барысында қатысушылар грантты өтеу мерзімі, жұмыс орнын таңдау мүмкіндіктері, ауылдық жерлерде еңбек ету шарттары және міндеттемелер орындалмаған жағдайда қолданылатын шаралар туралы маңызды ақпарат алды.
Негізгі тақырыптарға қосымша ретінде кездесуде келесідей маңызды мәселелер қозғалды:
Еңбекпен өтеуден босату: Спикер түлектердің қандай ерекше жағдайларда міндеттемелерден босатылатынын түсіндірді (мысалы, магистратураға/резидентураға түсуіне байланысты, денсаулық жағдайы бойынша немесе отбасылық жағдайларға байланысты).
Жұмысқа орналасу мониторингі: «Қаржы орталығы» АҚ жұмыс істеу фактісін растау үшін зейнетақы жарналарына тұрақты түрде мониторинг жүргізетіні атап өтілді.
Университет болашақ мамандарға мансабын нық бастауға және мемлекеттік міндеттемелерге қатысты құқықтық қиындықтардың алдын алуға көмектесу үшін алдағы уақытта да осындай кеңес беру шараларын өткізуді жоспарлап отыр.
Қазақ тілі