2026 жылдың 24 ақпанында Халықаралық туризм және меймандостық университетінде т.ғ.д., қауымдастырылған профессор М. Қожаның жетекшілігімен BR28713129 «Қазақстанға ислам дінінің енуін және таралуын археологиялық және жазба деректер негізінде зерттеу» ғылыми бағдарламасы аясында «2025 жылы ортағасырлық Отырар және Құйрықтөбе ескерткіштерінде жүргізілген ғылыми зерттеу жұмыстарының нәтижелері» тақырыбында онлайн-семинар өтті.
Семинар барысында ортағасырлық Отырар мен Құйрықтөбе ескерткіштерінде жүргізілген археологиялық және пәнаралық зерттеулердің нәтижелері таныстырылды. Табылған жәдігерлердің түрлеріне, жасалу технологиялары мен хронологиясына, сондай-ақ қазба жұмыстары кезінде табылған шыны бұйымдардың өзіндік ерекшеліктеріне, олардың типтері мен мерзімделуіне ерекше назар аударылды.
Шақырылған сарапшы — Қазан федералды университетінің доценті, т.ғ.к. Светлана Игоревна Валиулина шыны бұйымдармен жұмыс істеу тәжірибесімен бөлісіп, ортағасырлық Отырардан табылған жәдігерлерге бірлескен химиялық талдау жүргізуді ұсынды.
Семинарға Қазан федералды университетінің, Астана халықаралық университетінің, Қорқыт Ата атындағы Қызылорда университетінің және Қожа Ахмет Ясауи атындағы Халықаралық қазақ-түрік университетінің оқытушылары мен докторанттары қатысты.
Қатысушылар дала жұмыстарының негізгі қорытындыларын, соның ішінде аймақтың исламдану кезеңдерін растайтын артефактілер туралы жаңа мәліметтерді талқылады. Шыны бұйымдарды талдауға, олардың сипаттамаларына және табылған жәдігерлерді араб-парсы географтарының жазба деректерімен салыстыруға басымдық берілді. Семинар алдағы маусымға арналған жоспарлар мен мемлекеттік грантты іске асыру аясындағы мәдени мұраны сақтау мәселелеріне арналған пікірталаспен аяқталды.
Қазақ тілі
