Түрікменстан Президенті Сердар Бердымұхамедовтің Қазақстан Республикасына жасаған мемлекеттік сапары аясында Халықаралық туризм және меймандостық университеті (коммерциялық емес акционерлік қоғам) мен Түрікменстан мемлекеттік мәдениет институты арасында ынтымақтастық туралы Меморандумға қол қойылды.
Құжат екі ел арасындағы серіктестік байланыстарды нығайтуға, сондай-ақ академиялық және ғылыми ынтымақтастықты дамытуға бағытталған. Тараптар бірлескен білім беру бағдарламаларын, ғылыми-зерттеу жобаларын жүзеге асыру, тәжірибе алмасу, туризм, мәдениет және меймандостық саласындағы мамандардың біліктілігін арттыруға келісім жасады.
Халықаралық туризм және меймандостық университеті бүгінде кадрларды даярлаудың жоғары стандарттарын көрсетіп келеді. Оқу орнында дуалды оқу жүйесі кеңінен енгізілген. 850-ден астам студент жетекші қонақ үйлерде, мейрамханаларда және туристік ұйымдарда өндірістік тәжірибеден өтуде. Мұндай формат практикалық дағдыларды дамытуға және қазіргі еңбек нарығында сұранысқа ие, бәсекеге қабілетті мамандарды даярлауға мүмкіндік береді.
Меморандумға қол қою Қазақстан мен Түрікменстан арасындағы гуманитарлық ынтымақтастықты нығайту жолындағы маңызды қадам болып, заманауи білім беру бастамаларын ілгерілетуге және білікті кәсіби кадрларды даярлауда жаңа мүмкіндіктер ашады.
Қазақ тілі